Кэмпэндээйигэ Улуу Кыайыыны уруйдаатыбыт
Улуу Кыайыы күнүн Кэмпэндээйигэ бары нэһилиэгинэн күргүөмнээхтик көрүстүбүт. Уһуйаан оҕолоро Кыайыы скверигэр кэлэн турбут өйдөбүнньүктэри кытары билистэр, иитээччилэр сэрии туһунан кэпсээтилэр. Бибилэтиэкэҕэ эр санаа уруоктара ыытылыннылар, үөрэнээччилэр сэрии сылларын туһунан тахсыбыт кинигэлэр быыстапкаларын, төрөөбүт Кэмпэндээйилэригэр ыар сылларга туус хостуурга Сталин уурааҕын толорон күүстээх үлэ барыытын, хаайыы кэлиитин, саха снайпер буойуттара Егор Петров, Федор Охлопков, Иван Кульбертинов, Георгий Федоров, герой пионердар тустарынан сиһилии билистилэр. Оҕолор тыыл ветераннарын, сэрии тулаайахтарын эҕэрдэлээтилэр, кылаастарынан Кыайыы түннүгэ аахсыйаҕа кытыннылар. Ыам ыйын 9 кунугэр сарсыарда Кыайыы скверигэр венок ууруутун кэннэ үөрэнээччилэр парадтаан хааман ньиргиттилэр, ырыа ыллаатылар, хоһоон аахтылар. "Арассыыйа ийэлэрэ" түмсүү полевой куукуна тэрийэн минньигэс саллаат хааһытынан күндүлээтилэр. Өлбөт үйэлээх мэҥэ пуолка байыастарыгар анаан истиэндэ турда. Манна бибилэтиэкэ иһинэн үлэлиир "Эдэр кыраайы үөрэтээччилэр" кулууптара 2015 сылтан көрдүүр үлэлэрин түмүгэр Кэмпэндээйиттэн сэриигэ ыҥырыллан барбыт эбии 30 буойун ааттарын булбуттара турда.
Киэһэ саҥа арыллыбыт кулууппутугар оскуола үөрэнээччилэрэ, учууталлара, нэһилиэк эдэр ыччата, кулууп, бибилэтиэкэ үлэһиттэрэ бэлэмнээн туруорбут "Уллуҥ" диэн ааттаах испэктээкил көрдөрдүбүт. Кэмпэндээйи хаайыытын туһунан "Ньургуһун" литературнай түмсүү салайааччыта Августина Попова-Кыыдаана суруйбут кэпсээниттэн 6 көстүүлээх испэктээкили олохтоохтор бэркэ сэргээн көрөн дохсун ытыс тыаһын бэлэхтээтилэр. Манна сэрии саҕанааҕы ыаллар олохторо атыйахтаах уу курдук ыһыллыыта, байыаннай нолуок, суут, НКВД үлэһиттэрэ, кырыктаах хаайыы начальнига Бурлов, туус собуотун дириэктэрэ Камынин, ыстахаанабыс Апанаас Дьэпсиэйэп, аччыктааһын, өлүү-сүтүү барыта көстөн ааста. Чахчы да норуот суруйааччыта Наталья Михалева-Сайа суруйбутун курдук "кыргыс уот кэмин кырыыһа, дьылҕа ыар ынчык ытабыла" буолан оспот бааһы хаалларбыт Кэмпэндээйи биир кистэлэҥэ....
Салҕыы оскуола үөрэнээччилэрэ Кыайыы күнүгэр аналлаах кэнсиэри көрдөрөннөр 1975 сылтан кэлбит үтүө үгэһи сөргүтүллэр, оҕолор элбэх сэрии туһунан ырыалары, үҥкүүлэри бэлэмнээбиттэр. Улуу күнү өйдөбүнньүк уотунан түмүктээн нэһилиэк дьоно Кыайыы пааматынньыктарыгар чүмэчи уотун уурдулар.
Татьяна Местникова, бибилэтиэкэр